Bahalaşma olacaq?

2020-05-28 19:45:22 / 8948 dəfə oxunub
Koronavirus pandemiyası əksər dünya ölkələrində olduğu kimi Azərbaycanda da müxtəlif sahələrə öz mənfi təsirini göstərib.

Bu sahələrdən biri də turizmdir. Sərhədlərin bağlı olduğu bir zamanda insanlar xarici ölkələrə üz tuta bilmir. Nəticə etibarilə, insanlarımız istirahət üçün ayırdıqları pullarını ölkə daxilində xərcləyə bilərlər.

Maraqlıdır ki, bu hal daxili turizmin inkişafına, yoxsa süni bahalaşmaya gətirib çıxara bilər?

Cebhe.info-ya açıqlamasında iqtisadçı Natiq Cəfərli bildirib ki, iki amil qiymət artımının qarşısını alacaq:

"Daxili turizmdə çox güman bu il canlanma olacaq. Amma böyük həcmdə canlanmanın olması o qədər də ağlabatan deyil. Birincisi, insanların davranış qaydaları, vərdişləri dəyişib. İnsanların böyük bir qismi bu virusu ciddiyə alır. Yeri gəlmişkən, ciddiyə də alınmalı xəstəlikdir. Artıq bu inamla onlar insanların çox olduğu yerlərdən çəkinməyə başlayırlar. Yəni, bu onların davranış qaydalarına təsir edib. İkincisi, insanların alıcılıq qabiliyyəti düşüb. Əhalinin son iki ayı götürsək gəlirlilik səviyyəsi xeyli azalıb. Bağlanan iş yerlərini, biznes sahələrini nəzərə alsaq, alıcılıq qabiliyyəti xeyli aşağı düşüb. Və belə olan halda da Azərbaycanda daxili turizmin müəyyən mənada canlanması baş versə, bu iki amil qiymətlərin kəskin artımının qarşısını ala biləcək. Yəni, qiymətlərin kəskin artması gözlənilmir”.

O, canlanmanın pandemiya səbəbilə əsasən kiçik və orta sahibkarlıq sahələrində olacağını söyləyib:

"Mənə elə gəlir ki, bir amil bütün dünya ölkələrində, eləcə də Azərbaycan turizmində olacaq. Belə ki, insanlar böyük otellərdən daha çox fərdi evləri kiraləməyə üstünlük verəcəklər. Əsasən də, dağ rayonlarında, təbiəti gözəl rayonlarda fərdi evlərin kirayə verilməsi sürətlənə bilər. Böyük bazar yarana bilər. Düzdür, onsuz da var idi. Sadəcə olaraq, bu bazar geniş inkişaf etməmişdi. Lakin bu il ciddi tələb yaranacaqsa, fərdi evləri icarəyə götürmək istəyən vətəndaşların sayı arta bilər. Bu da kiçik və orta sahibkarlığın turizm sahəsində inkişafına dəstək ola bilər. Bu mənada böyük otellərdən daha çox fərdi evlərin kirayənlənməsi bu il üçün gözlənilən olacaq. Çünki pandemiya dövrüdür və insanlar əksəriyyətin olduğu yerlərdən qaçmağa çalışır".
Son xəbərlər
Tramp Qarabağdan danışdı
2020-09-28 03:56:14
Bütün hüquqlar qorunur: © Copyright 2016-2019 SabahInfo.az Müstəqil İnformasiya Agentliyi
Ünvan: Bakı şəhəri, Azərbaycan Nəşriyyatı, 9-cu mərtəbə
Tel: (994 55) 440 34 97
Tel: (994 55) 627 08 25

E-mail: [email protected]
Baş Redaktor: Ədilzadə Ədil Tahir oğlu
DİQQƏT!!! Materiallardan istifadə edərkən SabahInfo.az Müstəqil İnformasiya Agentliyinə istinad zəruridir !!!