"Fransa hakimiyyəti hələ də Azərbaycanın yaratdığı yeni reallığı qəbul edə bilmir"

2020-11-21 21:08:44 / 1291 dəfə oxunub
Hazırda Fransanın Azərbaycana qarşı rəsmi səviyyədə münasibəti açıq düşmənçilikdən başqa bir şey deyil. Uzun illərdən bəri erməni lobbisinin ciddi təsiri altında olan Fran­sa hökuməti və şəxsən prezident Emmanuel Makron Azərbaycanın apardığı 44 günlük əks-hücum əməliyyatları dövründə işğalçı ölkəyə kifayət qədər siyasi, iqtisadi və hərbi dəstək göstərib.
Fransanın hərbi kəşfiyyatı mütəmadi olaraq Ermənistana məlumatlar ötürüb, Fransadan Ermənistana raket sistemləri də daxil olmaqla silah-sursat göndərilib. Rəsmi Paris ən yüksək səviyyədə Azərbaycanın münaqişədə üstünlük qazanacağına imkan verməyəcəyini vəd edib. Bu ölkənin diplomatları Avropa paytaxtlarında Ermənistanın xeyrinə iş aparıblar və həmin fəaliyyəti indi də da­vam etdirirlər. Makronun noyabrın 16-da Rusiya Prezidenti Vladimir Putinə zəng etməsi Fransa hakimiyyətinin və diplo­matiyasının bu istiqamətdə fəaliyyətini davam etdirdiyini aydın göstərir.
İndi isə Paris meriyası qondar­ma "Dağlıq Qarabağ Respublikası”nı tanımağa hazırlaşır. Prosesin Fransa hakimiyyəti tərəfindən sanksiyalaşdı­rıldığı şübhə doğurmur. Bununla bağlı Parisin meri Ann İdalqo xüsusi cəhdlər göstərir. O, qatı ermənipərəst mövqe­yi ilə tanınır, onun erməni lobbisinin tam nəzarətində olduğu bildirilir. Hətta onun müavinlərindən biri erməni Anuş Toronyandır. Anuş Toronyan Fransa ermənilərinin təşkilatı CCAF-ın rəhbəri Ara Toronyanın qızıdır.
O da məlumdur ki, 2015-2018-ci illərdə Ann İdalqo Ermənistanın sa­biq prezidenti Serj Sarkisyanla 4 dəfə görüşüb. İdalqo Ermənistanda yaradıl­mış "TUMO Center for Creative Tech­nologies” mərkəzinin Paris bölməsinin açılışında iştirak edib və hərtərəfli dəstək göstərib. TUMO-nun Xankəndidə də ofisi olub. Paris meri seçkiləri keçirilən zaman İdalqonun rəqibi Rəşidə Datinin Azərbaycanla əlaqələri olması barədə kampaniyanın başında erməni əsilli Murad Papazyan və Ara Toronyan da­yanıblar. O, Fransada erməni kilsəsinin açılışında iştirak edib, qondarma "erməni soyqırımı” ilə bağlı tvitlər paylaşıb. İndi bu şəxs qondarma "DQR”-in tanınması ilə bağlı iş aparır.
Amma Fransanın anti-Azərbaycan və Ermənistana dəstək cəhdləri indiyədək heç bir nəticə verməyib. Azərbaycan işğal altında olan torpaqları azad edərək heç bir qüvvənin tarixi ədalətin bərpasına maneçilik törətmək gücündə olmadığını bütün dünyaya göstərdi. Paris şəhərinin Dağlıq Qarabağdakı qondarma qurumu tanıması da heç bir nəticə verməyəcək. Bundan əvvəl İtaliyanın bəzi şəhərləri də tarixin arxivinə gömülmüş "DQR”-i tanıdı, lakin bunun heç bir praktiki nəticəsi olma­dı və məsələ qısa zamanda unuduldu.
Fransa hakimiyyəti bu addımı planlaşdırmaqla qondarma rejimin ləğv olunmuş statusu məsələsini ak­tuallaşdırmaq, məsələni ölü qurum olan ATƏT-in Minsk qrupu müstəvisinə qaytarmaq niyyətini güdür. Fransa hakimiyyəti hələ də Azərbaycanın yaratdığı yeni reallığı qəbul edə bilmir. Yaranmış yeni reallıq isə 30 il ərzində mövcud olmuş status-kvonun qorunub saxlanmasını qəti şəkildə istisna edir. Fransa bundan sonra da ATƏT-in Minsk qrupu həmsədri kimi mandatına zidd fəaliyyətini davam etdirəcəyi təqdirdə, prosedurlara uyğun olaraq, Azərbaycan Fransanın həmsədrlik institutundan kənarlaşdırılması və digər ölkə ilə əvəz edilməsi məsələsini qaldıracaq.
Fransanın hazırkı cəhdləri bölgədə atəşkəsin təmin olunmasına və Rusiya­nın münaqişənin həlli ilə bağlı göstərdiyi səylərə qarşı yönəlib. Fransa Rusiya və Türkiyənin münaqişənin həlli ilə bağlı fəallığına qısqanclıq edir və budan ciddi narahatdır.
Amma müxtəlif Avropa dairələrində Azərbaycanın mənfi imicinin formalaşdı­rılması istiqamətində fəal iş aparan Fran­sa öz tarixi keçmişinə nəzər salsaydı, daha məntiqli olardı. Fransa əli milyonlar­la insanın qanına batmış, ayrı-ayrı xalq­lara qarşı soyqırımı törətmiş ölkədir. Bu gün də bir sıra Afrika ölkələrində Fransa sabitliyin pozulması, hakimiyyətlərin devrilməsi, vətəndaş qarşıdurmasının təşkili ilə bağlı ardıcıl siyasət həyata keçirir. Fransa Əlcəzairdə, Vyetnamda, Mərakeşdə, Cibutidə, Çadda, Qabonda, Tunisdə milyonlarla sakini məhv edib. Tarix bunları unutmayıb.

İqbal MƏMMƏDOV, 
Milli Məclisin deputatı
Son xəbərlər
Qumbara Tərlan!
2020-12-03 11:36:33
Bütün hüquqlar qorunur: © Copyright 2016-2019 SabahInfo.az Müstəqil İnformasiya Agentliyi
Ünvan: Bakı şəhəri, Azərbaycan Nəşriyyatı, 9-cu mərtəbə
Tel: (994 55) 440 34 97
Tel: (994 55) 627 08 25

E-mail: [email protected]
Baş Redaktor: Ədilzadə Ədil Tahir oğlu
DİQQƏT!!! Materiallardan istifadə edərkən SabahInfo.az Müstəqil İnformasiya Agentliyinə istinad zəruridir !!!