NASA: 2030-cu illərdə insan Marsa ayaq basacaq

2015-04-20 14:49:52 / 8794 dəfə oxunub

Kosmik Agentliyin rəhbəri Marsın məskunlaşma üçün əla yer ola biləcəyini vurğulayıb


Marsa insan göndərməyi özünün əsas missiyalarından biri elan edən Amerika Milli Aerokosmik Agentliyi (NASA) yaxın gələcəkdə analoji missiyanı həyata keçirmək istəyən özəl şirkətlərin NASA-nın dəstəyi olmadan bunu etməsinin mümkün olmadığını bildirib. Bunu NASA-nın rəhbəri, ABŞ dəniz piyadalarının istefada olan general-mayoru Çarlz Bolden Nümayəndələr Palatasının Büdcə komitəsinin iclasında deyib.

Əsas vəzifələrinin Marsa insan göndərmək olduğunu söyləyən Ç. Bolden bu planları 2030-cu illərdə reallaşdırmağı düşündüklərini açıqlayıb: "İnsanların Yerdən asılılığına son qoymaq lazımdır. Mars Günəş sistemində Yer kürəsinə ən çox bənzəyən ərazidir və məskunlaşdırma üçün çox əla yer ola bilər”.

NASA rəhbəri qeyd edib ki, digər kosmik layihə - "Asteroid Redirect Mission” (ARM) Marsla bağlı nəzərdə tutulan kosmik missiyanın həyata keçirilməsi yolunda ilk addım olacaq. 2020-ci ilə planlaşdırılan ARM missiyasının əsas məqsədi asteroidin ələ keçirilməsi, onun Ay yaxınlığındakı orbitə gətirilməsi və asteroiddən qrunt nümunəsinin götürülməsidir. Layihə çərçivəsində NASA nəinki yeni elmi məlumatlar əldə edəcək, həm də Marsa uçuş üçün həyati əhəmiyyətə malik yeni texnologiyaları sınaqdan keçiriləcək. Məsələn, astronavtlar və yüklərin Yerətrafı orbitə (Aya) göndərilməsi üçün işlənib hazırlanan yeni "Space Launch System” (SLS) raket daşıyıcısının yekun sınağının keçirilməsi nəzərdə tutulub. NASA Marsa gedən yolda Aydan yükboşaltma məntəqəsi kimi yararlanmağı düşünür.

"Mars One”, "SpaceX” kimi özəl şirkətlərə gəlincə, Ç. Bolden bəyan edib ki, NASA-nın və hökumətin dəstəyi olmadan onlar Marsa uça bilməzlər.

Son xəbərlər
Nazir yeni rəis təyin etdi
2019-10-16 16:12:57
Bütün hüquqlar qorunur: © Copyright 2016-2019 SabahInfo.az Müstəqil İnformasiya Agentliyi
Ünvan: Bakı şəhəri, Azərbaycan Nəşriyyatı, 9-cu mərtəbə
Tel: (994 55) 440 34 97
Tel: (994 55) 627 08 25

E-mail: [email protected]
Baş Redaktor: Ədilzadə Ədil Tahir oğlu
DİQQƏT!!! Materiallardan istifadə edərkən SabahInfo.az Müstəqil İnformasiya Agentliyinə istinad zəruridir !!!