Astarada “VI Azərbaycan-Alman-Türk Tibb Konqresi” və VIII Bakı Beynəlxalq Tibbi Treyninq Günləri” keçirilir

22 aprel 2023-cü il tarixində Heydər Əliyev Fondunun dəstəyi ilə Astara rayonunda Ulu Öndər Heydər Əliyevin anadan olmasının 100 illiyinə həsr edilmiş Beynəlxalq səviyyəli VI Azərbaycan-Alman-Türk Tibb Konqresi və VIII Bakı Beynəlxalq Tibbi Treyninq Günləri öz işinə başlayıb.

Tədbirdə VI Azərbaycan-Alman-Türk Tibb Konqresi və VIII Bakı Beynəlxalq Tibbi Treyninq Günlərinin təşkilat komitəsinin sədri, Azərbaycan Ürək və Sağlamlıq Assosiasiyasının İdarə heyətinin sədri, millət vəkili, Azərbaycan Respublikası Dövlət Gömrük Komitəsi Tibbi Xidmət İdarəsinin Elmi Təcrübi Tədris Mərkəzinin rəisi Rəşad Mahmudov, Astara Rayon İcra Hakimiyyətinin başçısı Qəzənfər Ağayev, Özbəkistan Respublikasının səhiyyə nazirinin müavini Abrorcon Alicanov, TƏBİB-in İcraçı direktorunun müavini Anar İsrafilov, Əziz Əliyev adına Həkimləri Təkmilləşdirmə İnstitutunun direktoru Nazim Qasımov, Konqresin ideya müəllifi, Azərbaycan Minimal İnvaziv Cərrahlar Cəmiyyətinin sədri Qurbanxan Müslümov, Millət vəkilləri İlham Məmmədov, Müşfiq Məmmədli, Almaniya, Türkiyə, Özbəkistan, Slovakiya, Bosniya-Hersoqovina, Filippin, Sinqapur və bir sıra dünya ölkələrindən olmaqla 60 nəfərdən çox xarici məruzəçi, moderator, eyni zamanda Avropa və Asiya Endoskopik və Laparoskopik cərrahlar cəmiyyətlərinin rəsmiləri, bölgələrdə fəaliyyət göstərən tibb müəssisəslərində çalışan tibb heyəti və digər qonaqlar iştirak edib.

Konqres iştirakçıları ilk olaraq Ümummilli lider Heydər Əliyevin Astarada ucaldılmış abidəsini ziyarət edərək tər çiçəklər düzüb, onun əziz xatirəsini ehtiramla yad ediblər.

Daha sonra Azərabaycan Respublikasının Dövlət Himni səsləndirilib, əbədiyaşar lider Heydər Əliyevə həsr edilmiş sənədli film izlənilib. Ümummilli lider bir dəqiqəlik sükutla yad edilib.

Açılış nitqi ilə çıxış edən Astara Rayon İcra Hakimiuyətinin başçısı Qəzənfər Ağayev beynəlxalq konfransın Astarada keçirilməsinin mahiyyət və önəmindən bəsh edib. Q.Ağayev Ulu Öndər Heydər Əliyev tərəfindən bölgələrdə səhiyyə sahəsinin inkişafı istiqamətində əvəzsiz işlər görüldüyünü bildirib. O, ölkəmizdə vətəndaşların tibbi xidmətə əlçatanlığının təmin edilməsi məqsədilə həyata keçirilən islahatların tarixi varislik missiasının əsas hissəsi olduğunu qeyd edib.

Sonra Milli Məclisin Səhiyyə Komitəsinin sədr müavini, Azərbaycan Respublikası Dövlət Gömrük Komitəsi Tibbi Xidmət İdarəsinin Elmi Təcrübi Tədris Mərkəzinin rəisi Rəşad Mahmudov xalqımızın xilaskar övladı, müasir Azərbaycanın qurucusu Heydər Əliyevin dövlətçiliyimizin yaranmasındakı xidmətlərindən danışıb. Millət vəkili bildirib ki, xalqın təkidli tələbi ilə yenidən hakimiyyətə gələn Heydər Əliyev qısa zamanda unudulmuş digər sahələr kimi, ölkə səhiyyəsinə də yeni nəfəs verdi.

Rəşad Mahmudov qeyd etdi ki, xalqın sağlamlığının digər taleyüklü məsələr kimi öndə olması, ixtisaslı milli kadrların hazırlanması prosesi, habelə, ölkənin səhiyyə sisteminin müasir çağırışlar fonunda inkişaf etdirilməsi Heydər Əliyev siyasətinin əsas istiqamətlərindən biri idi. R. Mahmudov bildirib ki, məhz ulu öndərin birbaşa rəhbərliyi altında böyük gənclik ordusunun xarici ölkələrdə yüksək tibbi təhsil arxasınca göndərilməsi kimi tarixi qərar sonrakı dövrdə ölkə səhiyyəsinin üzləşə biləcəyi kadr çatışmazlığının qarşısının alınmasna hesablanmış əvəzsiz xidmət nümunəsi idi.

R.Mahmudov əsası Ulu Öndər Heydər Əliyev tərəfindən qoyulan səhiyyə strategiyası, onun inkişafı, dövlətin bu sahəyə qayğısı, prioritet istiqamət kimi baxması Heydər Əliyev siyasi məktəbinin layiqli davamçısı Prezident İlham Əliyev tərəfindən qüsursuz şəkildə davam etdirildiyini vurğuladı. Rəşad Mahmudov bununla yanaşı, tibbdə xidmət keyfiyyətinin yaxşılaşdırılması, vətəndaş məmnunluğunun artırılması, maddi-texniki bazanın müasir standartlara daha uyğun şəkildə formalaşdırılması və həkimlərin sosial rifahının yaxşılaşdırılması istiqamətində uğurlu işlərin görüldüyünü diqqətə çatdırdı.

TƏBİB-in İcraçı direktorun müavini Anar İsrafilov konfransın keçirilməsinin böyük tarixi əhəmiyyət daşıdığını bildirib. O, Ulu Öndər Heydər Əliyevin ölkə səhiyyə sferasını əhatə edən köklü islahatların həyata keçirilməsində rolu və müstəsna xidmətlərinin tibb işçiləri tərəfindən böyük minnətdarlıqla anıldığını qeyd edib. A.İsrafilov hələ siyasi hakimiyyətə gəlişinin ilk illərindən bütün ölkə miqyasında səhiyyə sisteminin kompleksləşdirilməsi istiqamətində gördüyü işlərin, tibb ocaqlarının həmin dövrün standartlarına cavab verən tərzdə yenidən və əsaslı qurulmasının, əhalinin sağlamlığının qorunması istiqamətində imzalanmış sənədlərin tarixi əhəmiyyət daşıdığını vurğulayıb. Heydər Əliyevin siyasi kursu bütün istiqamətlərdə olduğu kimi səhiyyə sahəsində də ölkə başçısı cənab İlham Əliyev tərəfindən uğurla davam etdirildiyini qeyd edən İcraçı direktorun müavini hazırda səhiyyəmizin ölkə başçısı İlham Əliyev və Birinci vitse-prezidenti Mehriban Əliyevanın həssas qayğısı ilə özünün intibah dövrünü yaşadığına əminliyini ifadə edib.

Azərbaycan Respublikası səhiyyə naziri Teymur Musayev və Özbəkistan Respublikasının səhiyyə naziri İnoyatov Amrillo Shodievichin konfrans iştirakçılarına video müraciətləri ünvanlanıb. Daha sonra Azərbaycan Minimal İnvaziv Cərrahlar Cəmiyyətinin sədri Qurbanxan Müslümov Özbəkistan səhiyyəsinin inkişafında göstərdiyi xidmətlərə görə Özbəkistan Respublikasının Səhiyyə Nazirliyi tərəfindən medalla təltif edilib. Heydər Əliyev Fondu üçün xüsusi təsis edilmiş Ulu Öndər Heydər Əliyevin 100 illiyinə həsr edilən xatirə hədiyyəsi Özbəkistan Respublikasının səhiyyə nazirinin müavini Abrorcon Alicanov tərəfindən Rəşad Mahmudova təqdim edilib.

Tədbirdə çıxış edən Millət vəkilləri İlham Məmmədov, Müşfiq Məmmədli, Azərbaycan Minimal İnvaziv Cərrahlar Cəmiyyətinin sədri Qurbanxan Müslümov, Əziz Əliyev adına Həkimləri Təkmilləşdirmə İnstitutunun direktoru Nazim Qasımov, AMEA-nın müxbir üzvü Südeyf İmamverdiyev, Prof. Stefan Post Konqresin mahiyyətindən və iştirakçıların əldə edəcəyi zəngin təcrübədən bəhs ediblər. Tədbir plenar iclaslar və mədəni proqram ilə davam etdirilib.

Qeyd edək ki, 22 aprel 2023 tarixində öz işinə başlayan konqres işini 23 aprel 2023-cü il tarixində Cənub regionu, Astara, Lerik və Masallı Rayon Mərkəzi Xəstəxanalarında treyninq və ustad dərsləri ilə davam etdirəcək. Treyninq və ustad dərsləri çərçivəsində 12 ixtisas üzrə təlimlər keçiriləcək və regionda ilk dəfə icra olunacaq endoskopik əməliyyat plenar iclas zalına birbaşa translyasiya olunacaq və interaktiv müzakirə ediləcək. Tədbir 24-25 aprel tarixləridə Bakı şəhərində davam edəcəkdir.