"Azərbaycanın aprel döyüşləri zamanı azad etdiyi əraziləri geri qaytarmaq istəyən erməni veteranlar silahı haradan əldə edəcəklər? Silahlar Müdafiə Nazirliyinin balansındadır. Həmin silahlar həm hərbi hissələrin, həm də nazirliyin anbarlarda yerləşdirilib. Həmin şəxslər hər hansı əmrə tabe olmadan, heç bir səfərbərlik olmadan hansı yolla ön xəttə gedəcəklər?"
sabahinfo.az anspress-ə istinadən xəbər verir ki, bu sözləri erməni veteranların Azərbaycana hücum edəcəkləri ilə bağlı bəyanatlarını şərh edən Müdafiə Nazirliyinin ehtiyatda olan hərbçisi, general-leytenant Yaşar Aydəmirov ANS TV-nin "Xəbərçi" verilişinin qonağı olarkən deyib.
Onun sözlərinə görə, qarşı tərəfin keçmiş səhra komandirlərinin bu fikirləri reallıqdan uzaqdır və şou xarakterlidir: "Bu, reklam xarakteri daşıyan bir çıxışdır. Ermənistan hakimiyyəti, sözsüz ki, bunun qarşısını almalıdır. Bu, anarxiyaya doğru atılan növbəti addımdır. Əgər söhbət ehtiyatda olan hərbçilərdən gedirsə, həmin hərbçilər səfərbərlik ehtiyatlarıdır və müdafiə nazirinin qərarından sonra orduya çağırıla və ön xəttə gedə bilərlər. Əgər onlar belə çıxışlar edə bilirlərsə, deməli, Ermənistanda müxtəliftirəlik davam edir və məsələni həll etməyən müxtəlif qüvvələr var".
General-leytenant onu da bildirib ki, belə bir hal baş versə, Azərbaycan Silahlı Qüvvələrinin ön xətdə duran hərbçiləri heç bir səfərbərlik elan etmədən, heç bir qüvvəni ön xəttə çəkmədən özləri cavab verəcəklər: "Həmin veteranların bu addımı sadəcə Azərbaycana şans verəcək. Budəfəki addımda isə bir neçə strateji yüksəklik yox, bir neçə rayon işğaldan azad ediləcək. Məgər bir bunu gözləmirik?"
Bu gün virtualaz.org yazıb ki, Ermənistanda müxalif cərəyanlardan birinin rəhbəri Qaqerin Çukazyan, onun müavini Qurucan Avetisyan və veteranlardan ibarət "Şaqan batalyonu"nun keçmiş hərbçiləri Azərbaycana hücumla bağlı sensasion bəyanatla çıxış ediblər.
Həmin hərbçilər bildiriblər ki, onlar Ermənistanın müdafiə naziri Seyran Ohanyanın qadağasına baxmayaraq, Qarabağ cəbhəsindən hücum edib aprel döyüşləri zamanı itirilmiş 800 hektar ərazini azad etməyə hazırlaşırlar. Öz müraciətlərində veteranlar və könüllülər hətta bəyan ediblər ki, onlar Ermənistan hakimiyyətinin bu məsələyə müdaxiləsinə hərbi yolla cavab verəcəklər.
