Avqustun 24-də Yeni Azərbaycan Partiyası Ucar rayon təşkilatının videoformatda IX hesabat konfransı keçirilib.
Əvvəlcə Azərbaycan dövlətinin qurucusu, Yeni Azərbaycan Partiyasının yaradıcısı, ümummilli lider Heydər Əliyevin və Azərbaycanın ərazi bütövlüyü uğrunda şəhid olan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiqləndikdən sonra YAP Ucar rayon təşkilatının sədri Şəhla Abdullayeva hesabat məruzəsi ilə çıxış edib. Bildirib ki, ulu öndər Heydər Əliyev siyasətinin təntənəsi kimi dəyərləndirilən tarixi Zəfərimiz Azərbaycan xalqının necə məğrur, yenilməz xalq olduğunu bir daha dünyaya nümayiş etdirdi. Ölkə Prezidenti, Müzəffər Ali Baş Komandan İlham Əliyevin qətiyyəti sayəsində rəşadətli Azərbaycan Ordusu yeni tarix yazmaqla ölkəmizin qarşısında yeni imkanlar yaratdı.
Ş.Abdullayeva qeyd edib ki, YAP Ucar rayon təşkilatı partiyamızın VII Qurultayında qarşıya qoyulan vəzifələrin uğurlu icrasına öz töhfəsini vermək üçün bütün qüvvə və bacarığını səfərbər edib.
Ucar rayon təşkilatının sədri vurğulayıb ki, hazırda YAP Ucar rayon təşkilatının 68 ərazi ilk partiya təşkilatı özündə 3974 üzvü birləşdirir. Onlardan 2488 nəfəri qadınlar, 992 nəfəri isə gənclərdir.
Sonra YAP Ucar rayon təşkilatının Nəzarət Təftiş Qrupunun üzvü Fuad Bəbirxanovun hesabat məruzəsi dinlənilib.
Müzakirələr zamanı çıxış edən YAP Ucar rayon təşkilatı İdarə Heyətinin üzvü, Ucar Rayon İcra Hakimiyyətinin başçısı Mənsur Məmmədov, Milli Məclisin deputatı Ramil Həsən, rayon təşkilatının Şura üzvləri - təşkilatın Qadınlar Şurasının sədri Yaqut Zeynalova və rayon təhsil şöbəsinin metodisti Rəna Qasımova, rayon təşkilatı Gənclər Birliyinin sədri Yusif Məmmədov hesabat dövründə görülən işlərdən bəhs ediblər.
Konfransda YAP Mərkəzi Aparatının Təşkilat şöbəsinin müdiri Əhliman Tağıyev çıxış edərək bildirib ki, müasir, müstəqil Azərbaycan dövlətinin qurucusu, ulu öndər Heydər Əliyevin əsəri olan YAP-ın siyasəti xalqın iradəsinə əsaslanır.
Ə.Tağıyev Yeni Azərbaycan Partiyasının VII qurultayında qəbul olunan qərarlardan geniş bəhs edərək bildirib ki, dövlət başçısı, Partiyamızın Sədri cənab İlham Əliyevin nitqində səsləndirdiyi fikirlər, qarşıya qoyulan vəzifələr YAP-ın hər bir üzvünün gələcək fəaliyyət proqramıdır.
Partiyanın qarşısında duran yeni məqsəd və vəzifələrdən bəhs edən Ə.Tağıyev YAP Ucar rayon təşkilatına gələcək fəaliyyətində uğurlar arzulayıb.
Konfransda YAP Ucar rayon təşkilatının hesabat dövrü ərzindəki fəaliyyəti qənaətbəxş qiymətləndirilib.
**
Avqustun 24-də Yeni Azərbaycan Partiyası (YAP) Ağdaş rayon təşkilatının videoformatda VIII hesabat konfransı keçirilib.
Əvvəlcə müasir, müstəqil Azərbaycan dövlətinin qurucusu, Yeni Azərbaycan Partiyasının yaradıcısı, ulu öndər Heydər Əliyevin və Azərbaycanın ərazi bütövlüyü uğrunda şəhid olan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiqləndikdən sonra YAP Ağdaş rayon təşkilatının sədri, Milli Məclisin deputatı Cavid Osmanov hesabat məruzəsi ilə çıxış edib. Bildirib ki, 2020-ci ildə rəşadətli Azərbaycan Ordusu ölkə Prezidenti, Müzəffər Ali Baş Komandan İlham Əliyevin rəhbərliyi ilə tariximizə Zəfər gününü yazıb. 44 günlük İkinci Qarabağ müharibəsi 30 ilin işğalına son qoydu, Azərbaycanın ərazi bütövlüyünü bərpa etdi. C.Osmanov deyib ki, zəfər əldə edən Azərbaycan özünün yeni inkişaf mərhələsinə qədəm qoyub. Azərbaycan xalqının müqəddəratını həll edən, dünənin, bu günün və sabahın məsuliyyətini öz üzərinə götürən, müstəqil Azərbaycan dövləti ilə eyni zamanda təşəkkül tapan Yeni Azərbaycan Partiyası da aparıcı siyasi qüvvə kimi fəaliyyət göstərdiyi 29 ilə yaxın bir dövrdə bütün qüvvə və bacarığını xalqa xidmətə yönəldərək, bir-birindən əhəmiyyətli uğurlara imza atıb. Partiyamızın yaradıcısı ümummilli liderimiz Heydər Əliyevin zəngin təcrübəsi, müstəqil, demokratik, hüquqi dövlət quruculuğu yolunda gərgin fəaliyyəti Azərbaycanın bugünkü və gələcək taleyini müəyyən edib.
Qeyd olunub ki, hazırda YAP Ağdaş rayon təşkilatında 77 ərazi ilk partiya təşkilatında birləşən partiya üzvlərimizin sayı 16650 nəfərdir. Onlardan 8646 nəfərini qadınlar, 4454 nəfərini gənclər təşkil edir. VII konfransdan ötən dövr ərzində 310 nəfər partiya rayon təşkilatının sıralarına qəbul edilib.
Sonra YAP Ağdaş rayon təşkilatının Nəzarət-Təftiş Qrupunun üzvü Cabir Həsənov hesabat məruzəsi ilə çıxış edib.
Müzakirələr zamanı çıxış edən YAP Ağdaş rayon təşkilatı İdarə Heyətinin üzvləri - Ağdaş Rayon İcra Hakimiyyətinin başçısı Tofiq İbrahimov, Ağdaş şəhər ərazi ilk partiya təşkilatının sədri, M.Şeyxzadə adına Ağdaş Texniki, Təbiət və Humanitar fənlər təmayüllü Gimnaziyanın direktoru Şəhla Hacıbalayeva, rayon təşkilatının baş məsləhətçisi Anar Şahmuradov, Gənclər və İdman idarəsi ərazi ilk partiya təşkilatının sədri, rayon Gənclər və İdman idarəsinin rəisi Azad Gözəlov, Təşkilatın Şura üzvü, rayon Təhsil şöbəsi ərazi ilk partiya təşkilatının sədri, rayon Təhsil şöbəsinin aparıcı məsləhətçisi Afət Ramazanova hesabat dövründə görülən işlərdən bəhs ediblər.
Konfransda YAP Mərkəzi Aparatının Təşkilat şöbəsinin müdiri Əhliman Tağıyev çıxış edərək VIII konfrans münasibətilə rayon təşkilatının üzvlərini təbrik edib. Ə.Tağıyev bildirib ki, Yeni Azərbaycan Partiyasının xalq, dövlət qarşısındakı böyük xidmətləri bu nəhəng təşkilatın cəmiyyətdəki mövqelərini get-gedə daha da möhkəmləndirir, insanların bu partiyanın ideoloji-siyasi xəttinə dəstəyini gücləndirir. Bu gün Azərbaycanın tarixinin ən güclü, ən qüdrətli dövrünü yaşadığını vurğulayan Ə.Tağıyev deyib ki, 44 günlük Vətən müharibəsindən alnıaçıq çıxan Azərbaycan dövləti böyük Zəfər günlərini qeyd edir. Vətən müharibəsindən qalib çıxan Azərbaycan 30 illik işğala son qoyaraq ərazi bütövlüyünü bərpa edib, bölgədə və dünyada yeni reallıqlar yaradıb. Ölkəmiz özünün iqtisadi, siyasi çəkisinə görə fərqli bir dövlətdir. Yəni bütövlükdə, Azərbaycan fərqli bir reallıq yaradıb və bu yeni reallıqlara uyğun qarşımızda yeni çağırışlar, vəzifələr durur.
Ə.Tağıyev YAP Ağdaş rayon təşkilatına gələcək fəaliyyətində uğurlar arzulayıb.
Konfransda YAP Ağdaş rayon təşkilatının hesabat dövrü ərzindəki fəaliyyəti qənaətbəxş qiymətləndirilib.
