Bəzi KİV-lərdə İran sərhəd keçid məntəqələri ilə bağlı yeni qaydaların  tətbiq edildiyi və bu qaydalara görə, Azərbaycan vətəndaşları İrana ayda iki dəfədən artıq buraxılmayacaqları ilə bağlı məlumatlar yayılıb.  

İran İslam Respublikasının Azərbaycandakı səfirliyi xəbərlərə münasibət  bildirib. Səfirliyinin mətbuat xidmətinin rəhbəri Seyid Məhəmməd Ayətullahi məlumatları təkzib edərək deyib ki, İran Azərbaycan vətəndaşları ilə bağlı heç bir məhdudiyyət qoymayıb.

O, İran İslam Respublikasının Azərbaycan və İran xalqları arasında əlaqələrın güclənməsində maraqlı olduğunu vurğulayaraq, əlavə edib ki,  Azərbaycan vətəndaşları viza  rejiminin ləğv olunması haqqında qanundan istifadə edərək, istənilən zaman İrana səfər edə bilərlər.

Ayətullahi qeyd edib ki, İran nəinki Azərbaycan vətəndaşlarının İrana səfərinə məhdudiyyət qoyulmasını istəmir, hətta gediş-gəlişin asanlaşdırılması üçün sərhəd keçid məntəqələrinin iş saatını artırıb.