“İnzibati Xətalar Məcəlləsinə təklif olunan dəyişikliklər jurnalistlərin fəaliyyətini məhdudlaşdırmır. Tam əksinə, media etikasında əksini tapmış fundamental prinsiplərin qanun çərçivəsində təsbit olunmasına xidmət edir. Bütün məsələlər jurnalistlərin, media qurumlarının daha müstəqil fəaliyyət göstərmələrinə, onların fəaliyyətinə kənar müdaxilənin qarşısının alınmasına yönəldilib. Qanuni qüvvəyə minmiş məhkəmə qərarı olmadan şəxsin təqsirli olması barədə məlumatların dərc edilməsinə, yayımlanmasına görə üç min beş yüz manatadək cərimə tətbiq ediləcək. Bu, maksimum həddir - jurnalistlərə yönəlməyib, vəzifəli şəxslərə aiddir. Vəzifəli şəxslər min manatdan min beş yüz manatadək, hüquqi şəxslər isə iki min beş yüz manatdan üç min beş yüz manatadək cərimə ediləcəklər. Dəyişikliklərin məqsədi jurnalistlərin peşə fəaliyyətinə qanunsuz müdaxilənin qarşısını almaqdır…”

Bu sözləri Pravda.az-a açıqlamasında Milli Məclisin Hüquq siyasəti və dövlət quruculuğu komitəsinin üzvü Vüqar İskəndərov deyib.

Deputat bildirib ki, mövcud Məcəlləyə təklif edilən dəyişikliklər jurnalistlərin müstəqilliyinin qorunmasına yönəldilib: “Jurnalistlərin cərimə olunmasından söhbət gedə bilməz. Burada jurnalistlər yox, rəhbər vəzifəli şəxslər, məsələn, media holdinqin rəhbəri nəzərdə tutulur. Bu, jurnalist fəaliyyətinin əhəmiyyətini azaltmır. Əksinə, jurnalistlərin maneəsiz fəaliyyət göstərmələri istiqamətində qanun pozuntusuna yol verən şəxslər inzibati məsuliyyət daşıyacaqlar. Təkcə inzibati yox, cinayət məsuliyyəti də nəzərdə tutulur. Bu, hələlik layihədir. Hüquq siyasəti və dövlət quruculuğu komitəsinin iclasında İnzibati Xətalar Məcəlləsinə təklif edilən dəyişikliklər müzakirə olunub. Təbii ki, layihə hələ müzakirədədir. Gələcəkdə plenar iclasda təklif olunacaq. Deputatlar tərəfindən geniş müzakirə aparılacaq”.

Aytəkin Qardaşov