Dövlət Təhlükəsizliyi Xidmətinin son əməliyyat-axtarış tədbirləri bir daha göstərdi ki, Azərbaycan Respublikasında sabitlik və milli təhlükəsizlik etibarlı əllərdədir. Ölkəmizdə uzun illər boyu “beşinci kolon” kimi fəaliyyət göstərən, xarici mərkəzlərin təsiri altında formalaşmış antiazərbaycan şəbəkələrinin gizli fəaliyyətləri ardıcıl şəkildə ifşa olunur və dövlət tərəfindən hüquqi qiymətini alır.

Bu proses bir daha sübut etdi ki, Azərbaycanın milli maraqlarına zidd fəaliyyət göstərən heç bir qurum, heç bir siyasi qrup və ya fərd qanundan üstün deyil. İllər boyu müxtəlif siyasi platformalarda özlərini “islahatçı”, “demokrat” və ya “akademik” adlandıran bəzi şəxslərin – o cümlədən Ramiz Mehdiyevin ətrafında formalaşmış dairələrin, eləcə də onun təsir orbitində olan siyasi qrupların(Əli Kərimlinin başçılığı ilə AXCP, Gültəkin Hacıbəyli kimi siyasi dönüklərin) – xarici tapşırıqlar əsasında hərəkət etməsi artıq cəmiyyətə məlum reallıqlardır. Bu fəaliyyətlər hüquqi müstəvidə araşdırılır və hər kəs qanun qarşısında cavab verir.

Tam aydındır ki, 2013-cü il prezident seçkiləri ərəfəsində Rusiyadakı müəyyən mərkəzlər tərəfindən formalaşdırılan “şura” və digər strukturların əsas məqsədi Azərbaycanı yenidən qeyri-sabitlik ortamına sürükləmək, 2003-cü ildə həyata keçirilməsi nəzərdə tutulan, lakin baş tutmayan siyasi planların reallaşdırılmasına şərait yaratmaq idi. Lakin xalq-iqtidar birliyinin gücü və dövlətin qətiyyətli mövqeyi həmin məkrli niyyətlərin qarşısını aldı.

Bu gün Azərbaycan tam başqa bir reallıqda yaşayır.

Ərazi bütövlüyünü tam bərpa etmiş, regionda söz sahibi olan güclü dövlət kimi artıq ictimai-siyasi sabitliyə qarşı yönələn bütün cəhdlərin kökündən qarşısı alınır və alınacaq. Bu gün Azərbaycan rəhbərliyi istər daxili, istərsə də xarici antiazərbaycan mərkəzlərinin bütün niyyətlərini zərərsizləşdirməyə qadirdir.

Hörmətli həmvətənlər!

Azərbaycan xalqının iradəsi, dövlətinin gücü və xalq-iqtidar birliyi qarşısında heç bir qaranlıq plan dayana bilməz. Bu ölkədə sabitliyi pozmaq, inkişafı ləngitmək və müstəqilliyi sarsıtmaq istəyən hər kəs bilməlidir ki, Vətənə xəyanətin nə keçmişi var, nə də gələcəyi. Heç bir zaman da bəraət yeri olmayacaq.

Yaşasın müstəqil Azərbaycan!

Yaşasın xalq-iqtidar birliyi!

Müşfiq Məmmədli

Milli Məclisin deputatı