Səfərbərlik Xidmətində 20 Yanvar şəhidləri anılıb

Səfərbərlik və Hərbi Xidmətə Çağırış üzrə Dövlət Xidmətinin Aparatında 20 Yanvar faciəsinin 27-ci ildönümünə həsr olunmuş tədbir keçirilib.

 

Xidmətdən APA-ya verilən məlumata görə, əvvəlcə 20 Yanvar şəhidlərinin xatirəsi 1 dəqiqəlik sükutla yad edilib.

 

Xidmət rəisinin birinci müavini general-mayor Zaur Abdullayev çıxış edərək 20 Yanvarın xalqın müstəqillik uğrunda mübarizəsində mühüm yer tutduğunu qeyd edib: "20 Yanvar faciəsinin dünyaya çatdırılmasında ümummilli lider Heydər Əliyevin Moskvadakı Azərbaycan nümayəndəliyinə gedərək mətbuat konfransı keçirməsinin və hadisə barədə həqiqətləri açıqlamasının böyük əhəmiyyəti olub”.

 

Anım mərasimi "Qanlı Yanvara aparan yol” sənədli filminin nümayişi ilə davam etdirilib. Daha sonra Səfərbərlik və Hərbi Xidmətə Çağırış üzrə Dövlət Xidmətinin şəxsi heyəti Şəhidlər Xiyabanını ziyarət edərək müstəqillik uğrunda canından keçmiş qəhrəman vətən övladlarının məzarları üstünə qərənfillər düzüblər.