"İnnovativ İdeya və Təşəbbüslər” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyilə "Regionda azsaylı xalqların nümayəndələri arasında milli ailə dəyərlərinin təbliği” layihəsini icra edir.

Layihə çərçivəsində Zaqatala Mədəniyyət Mərkəzinin Kebeloba kənd klubunda tədbir keçirilib.

Tədbirdə "İnnovativ İdeya və Təşəbbüslər” İctimai Birliyinin sədri və layihə rəhbəri Elşən Musayev layihənin əsas məqsədinin gənclərin ailə dəyərlərinə marağının artırılması və gənclərə bu dəyərlərimizə sahib çıxmalarının vacibliyinin aşılanmasından ibarət olduğunun bildirib.

Layihə rəhbəri ailə dəyərlərinin və adətlərinin qorunub saxlanılmasının, yaşadılmasının və gənc nəslə ötürülməsinin əhəmiyyətindən danışıb.

Elşən Musayev Azərbaycanda sosial sahədə dövlət siyasətinin prioritet istiqamətlərindən birini məhz ailə siyasətinin təşkil etdiyini diqqətə çatdırıb. Dövlətimiz üçün əsas dəyərlərin Azərbaycanın milli dəyərləri olduğunu qeyd edən layihə rəhbəri ailənin hərtərəfli inkişafı üçün dövlətimiz tərəfindən şəraitin yaradılmasına, onların müxtəlif problemlərinin həllinə xüsusi diqqət yetirildiyini vurğulayıb.