Dünyanın aparıcı beyin mərkəzləri Bazel-Qarabağ oyununun nəticələrinin geoidmani aspektlərini analiz edərkən maraqlı rəylər irəli sürmüşlər. Onların fikrincə, oyunun 1-ci dəqiqəsində xorvatiyalı hakimin ağdamlıların halal qolunu hesaba almamasının əsas səbəbi UEFA-nın mənzil qərargahının İsveçrədə yerləşməsi ilə əlaqədar ola bilər. Belə ki, hakimin bir neçə saniyə ərzində belə bir qərar qəbul etdiyi ehtimal olunur: UEFA burada yerləşir, qolu qeydə alsam, yaxşı çıxmaz. Ehtimal var ki, o, həmçinin ölkəsinin Avropa Birliyi və NATO üzvü olduğunu da nəzərə alıb və düşünüb ki, ata biləcəyi məsuliyyətsiz və hərdəmxəyal addımı rəsmi Zaqreb üçün baha başa gələ bilər. Hərçənd qalan müddətdə hakim tərəfindən hər hansı ədalətsizlik qeydə alınmamışdır.
Ədalət amilindən söz düşmüşkən, qonaqların koaçı Qurban Qurbanov İnsan hüquqları günündə (10 dekabr) qollarının sayılmamasını "halal haqqlarına girilmə" kimi klassifikasiya etmişdir. Ekspertlər hesab edir ki, əgər Qarabağ sayılmayan qola halal sertifikatı almağa müvəffəq olarsa, dünya, əsasən də onun müsəlman qisminin diqqətini bu ədalətsizliyə yönəldə bilər.
Geoidman mütəxəssisləri diqqəti daha bir amilə yönəltməyi məsləhət bilirlər. Belə ki, oyun ətəfəsində Azərbaycan mediasında UEFA mənzil-qərargahı amilinin nəticəyə təsir edəcək faktorlardan ola biləcəyi proqnozlaşdırılmışdır. Güman ki, yerli KİV-də 3 real qolu vura bilməyən İbrahima Vadjinin UEFAmeyilli qüvvələrlə əməkdaşlıq ehtimalları araşdırılacaq.
Yeri gəlmişkən, Varşavada Emrelililili Legiyanı 0:1 hesabı ilə məğlub edən Moskva Spartakı da hakimin qərəzli qərarı ilə üz-üzə qalmışdır. Rus şərhçilər maraqlı ehtimallar irəli sürmüşlər. Onların fikrincə, 94-cü dəqiqədə Spartakın qapısına təyin olunan şübhəli penalti gərgin Rusiya-Polşa münasibətləri ilə bağlı ola bilər. Penaltiyə Ukrayna ətrafındakı proseslərin prizmasından baxan rus ekspertlər istisna etmirlər ki, UEFA-nın mənzil-qərargahı coğrafi baxımdan Polşaya daha yaxın olduğundan sloveniyalı hakim belə qərar qəbul edib. Gözlənilir ki, yaxın aylar ərzində bu məsələ slavyanofillərin ciddi diqqətində olacaq. Çüni rus slavyan, polyak slavyan, sloven slavyan, Ukrayna slavyan və s.
Daha bir ehtimal ondan ibarətdir ki, Bazel-Qarabağ oyunu ekstrasenslərin də maraq dairəsinə düşə bilər. Belə ki, azərbaycanlı koaç oyunsonrası brifinqdə demişdir ki, 1-ci dəqiqədə qolumuzun sayılmaması oyunçularımı ruhdan salmışdır. Ruh... Bu zaman arxa sırada oturan bir isveçrəli jurnalist qəhqəhə çəkib gülmüşdür: 1-ci dəqiqə, Karl! Qarşıda hələ 89 dəqiqə var, Karl!
Rüstəm Qaraxanlı