Bakı-2015 Avropa Oyunları Əməliyyat Komitəsinin baş direktoru Saymon Kleq ümid edir ki, I Avropa Oyunları ilə idmanın yeni tarixi başlayacaq. Trend-in məlumatına görə, bununla bağlı məqalə Böyük Britaniyanın Standard.co.uk. saytında dərc edilib. S.Kleq bildirib: "Bu, mənim ən çətin layihələrimdən biri ola bilər. Belə tədbir ilk dəfə keçiriləcək və biz onu cəmi 30 aya təşkil etdik. Biz əla komanda topladıq. Bakı dünyanın ən gözəl paytaxtlarından biridir. Yerli şəraitə uyğunlaşdıq və işi yaxşı görməyə çalışırıq". Məqalədə deyilir ki, Avropanın müxtəlif ölkəsinin 6 mindən çox idmançısı 17 gün ərzində 16 Olimpiya və 4 qeyri-olimpiya idman növündə yarışacaq. Britaniyalı ulduzlar bu Oyunlarda iştirak edəcəklər, onlar arasında boksçu Nikola Adams, stolüstü tennisçi Kelli Sibli və taekvandoçu Ceyd Cons da var. S.Kleq diqqətə çatdırıb: "Biz hesab edirik ki, Oyunlar Azərbaycanın nə qədər inkişaf etdiyini və Azərbaycan xalqının mehribanlığını tam nümayiş etdirəcək. Avropa Oyunları Azərbaycanın gələcəklə bağlı gözəl planlarını təmin edəcək".