Avqustun 31-də Yeni Azərbaycan Partiyası Cəbrayıl rayon təşkilatının videoformatda X hesabat konfransı keçirilib.
Əvvəlcə müasir, müstəqil Azərbaycan dövlətinin qurucusu, Yeni Azərbaycan Partiyasının yaradıcısı, ulu öndər Heydər Əliyevin və torpaqlarımızın azadlığı uğrunda şəhid olan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiqləndikdən sonra YAP Cəbrayıl rayon təşkilatının sədri Arif Fərzəliyev hesabat məruzəsi ilə çıxış edib. Bildirib ki, Ümummilli Liderimizin yaradıcısı olduğu, dünənin, bu günün və gələcəyin partiyası kimi dəyərləndirdiyi, hazırda ölkə Prezidenti İlham Əliyevin rəhbərliyi ilə yeni-yeni hədəflərə doğru inamla irəliləyən Yeni Azərbaycan Partiyası cəmiyyətin avanqard qüvvəsi kimi nüfuzunu artırıb, sıralarını kəmiyyət və keyfiyyət baxımından zənginləşdirib. Yeni Azərbaycan Partiyası ölkəmizin ictimai-siyasi, iqtisadi, sosial və mədəni həyatında fəal iştirak edir. Partiyanın hər bir üzvü ulu öndər Heydər Əliyev ideyalarının, dövlət başçısı cənab İlham Əliyevin təkmil islahatları sayəsində müasirləşən, yeniləşən, hər gün yeni zəfərlərə imza atan Azərbaycanın uğurlarının təbliğatçılarıdırlar.
A.Fərzəliyev qeyd edib ki, hazırda rayon təşkilatının 39 ərazi ilk partiya təşkilatı fəaliyyət göstərir. Təşkilatın 3856 üzvü var. Onlardan 1702 nəfəri gənclər, 1574 nəfəri isə qadınlardır.
Sonra YAP Cəbrayıl rayon təşkilatının Nəzarət Təftiş Qrupunun üzvü Müşviq Əliyevin hesabat məruzəsi dinlənilib.
Müzakirələr zamanı YAP Cəbrayil rayon təşkilatı İdarə Heyətinin üzvü, Cəbrayıl Rayon İcra Hakimiyyətinin başçısı Kamal Həsənov, Milli Məclisin deputatı Ceyhun Məmmədov, rayon təşkilatı Gənclər Birliyinin sədri Əli Məmmədli, rayon təşkilatı Qadınlar Şurasının üzvü, M.Mehdizadə adına tam orta məktəbin direktoru Şəlalə Qasımlı çıxış edərək rayon təşkilatının hesabat dövrü ərzindəki fəaliyyətinə münasibətlərini bildiriblər.
Konfransda çıxış edən Yeni Azərbaycan Partiyası Mərkəzi Aparatının Təşkilat şöbəsinin müdiri Əhliman Tağıyev bildirib ki, bu gün müstəqil Azərbaycan özünün şanlı Zəfər tarixini yaşayır: “Ölkə Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 44 günlük Vətən müharibəsində yeni tarix yazdı. O tarixi ki xalqımız onu 30 il səbirsizliklə gözləyib, heç zaman ümidini itirməyib. Xalqımız tam əmin idi ki, dövlətimizin qətiyyəti sayəsində torpaqlarımız işğaldan azad ediləcək. Cənab İlham Əliyevin bu gün qalib ölkənin Prezidenti kimi işğaldan azad edilmiş ərazilərimizə səfərləri harada yaşamasından asılı olmayaraq hər bir azərbaycanlını qürurlandırır, sevinc hissi yaşadır”.
Çıxışını növbəti konfransın Cəbrayılda keçirilməsi arzusu ilə tamamlayan Ə.Tağıyev rayon təşkilatının fəaliyyətinə uğurlar diləyib.
Qeyd edək ki, YAP Cəbrayıl rayon təşkilatının hesabat dövründəki fəaliyyəti qənaətbəxş qiymətləndirilib.
***
Avqustun 31-də Yeni Azərbaycan Partiyası Füzuli rayon təşkilatının videoformatda VIII hesabat konfransı keçirilib.
Əvvəlcə Yeni Azərbaycan Partiyasının yaradıcısı, ulu öndər Heydər Əliyevin və Azərbaycanın ərazi bütövlüyü uğrunda şəhid olan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiq edildikdən sonra YAP Füzuli rayon təşkilatının sədri Almaz Həşimovanın hesabat məruzəsi dinlənilib. Bildirib ki, rayon təşkilatının VII konfransından keçən 3 ildən artıq müddət ərzində ölkəmizin həyatında mühüm uğurlar əldə edilib, iqtisadi, sosial və digər sahələrdə əsaslı irəliləyişlər olunub, Azərbaycanın dövlət müstəqilliyi daha da möhkəmlənib, beynəlxalq nüfuzu xeyli artıb. Bu gün Heydər Əliyev ideyalarının və onun siyası kursunun qətiyyətli davamçısı, Yeni Azərbaycan Partiyasının Sədri, ölkə prezidenti İlham Əliyevin çoxşaxəli səmərəli fəaliyyəti YAP-ın aparıcı mövqeyini daha da möhkəmləndirir.
Rayon təşkilatının sədri bildirib ki, YAP Füzuli rayon təşkilatının 63 ərazi ilk partiya təşkilatında 6674 üzv var. Onların 1958 nəfərini gənclər, 3099 nəfərini isə qadınlar təşkil edir.
Sonra YAP Füzuli rayon təşkilatının Nəzarət-Təftiş Qrupu sədri Rafiq Məstəliyevin hesabat məruzəsi dinlənilib.
Müzakirələr zamanı YAP Füzuli rayon təşkilatı İdarə Heyətinin üzvü, Füzuli Rayon İcra Hakimiyyətinin başçısı Alı Alıyev, Milli Məclisin deputatı Vüqar Bayramov, rayon təşkilatı İdarə Heyətinin üzvləri – təşkilatın sədr müavini Rəfael Zülfüqarov, Təhsil şöbəsi ərazi ilk partiya təşkilatının sədri Ramella Məmmədova, rayon təşkilatı Gənclər Birliyinin sədri Aydın Rəşidli hesabat dövrü ərzində görülən işlərdən bəhs ediblər.
Konfransda çıxış edən YAP Mərkəzi Aparatının Təşkilat şöbəsinin müdiri Əhliman Tağıyevə bildirib ki, Azərbaycanın dövlət müstəqilliyi, malik olduğu təbii sərvətləri, geopolitik üstünlükləri xalqımızın milli sərvətidir və hər bir Azərbaycan vətəndaşı kimi YAP-ın üzvləri də Azərbaycan Respublikasının dövlət müstəqilliyini və ərazi bütövlüyünü qorumağı özünün birinci dərəcəli vəzifəsi hesab edir. Prezident İlham Əliyevin rəhbərliyi ilə Yeni Azərbaycan Partiyası yeni reallıqların qarşıdakı illər üçün müəyyənləşdirdiyi hədəflərə yüksək səviyyədə nail olmaq potensialına, gücünə malikdir.
Ə.Tağıyev yeni mərhələdə partiyanın yerli təşkilatlarının üzərinə düşən vəzifələrdən də ətraflı bəhs edib, YAP Füzuli rayon təşkilatının gələcək fəaliyyətinə uğurlar arzulayıb.
Konfransda YAP Füzuli rayon təşkilatının hesabat dövrü ərzindəki fəaliyyəti qənaətbəxş qiymətləndirilib.