Cənubi Qafqazın lideri, torpaqlarını işğaldan müharibə yolu ilə azad edən dövlət, Avropanın enerji təhlükəsizliyinin təminatçısı, kosmik klubun üzvü… Azərbaycan dövlətinin müasir gerçəkliklərini əks etdirən bu ifadələrin sayını artırmaq da mümkündür. Və bütün bunlar bu gün Azərbaycana ilk dəfə Prezident seçilməsinin 22-ci ili tamam olan Prezident İlham Əliyevin rəhbərliyi ilə respublikamızın keçdiyi inkişaf yolunun ayrı - ayrı epizodlarıdır.
22 il öncə, oktyabr ayının 15-də keçirilən prezident seçkiləri Azərbaycan xalqının Ümummilli Lideri Heydər Əliyev siyasətinə olan etimadının növbəti təsdiqi oldu. Səsvermə hüququ olan seçicilərin mütləq əksəriyyəti öz səsini İlham Əliyevə verməklə bir daha Ulu Öndərin ideyalarının ətrafında sıx səfərbər oldu, Heydər Əliyev siyasi kursuna heç bir alternativi qəbul etmədiyini göstərdi. Bu seçkinin nəticəsi həm də cənab İlham Əliyevin rəhbərliyi ilə Azərbaycanın inkişafına və qüdrətli dövlətə çevrilməsinə olan ümumxalq inamının təcəssümünə çevrildi. Geridə qoyduğumuz 22 ilin siyasi və sosial-iqtisadi mənzərəsi, tarixin ən qüdrətli Azərbaycanını ifadə edən nailiyyətlərimiz bu inamın qürur doğuran təntənəsidir.
İlham Əliyevin 2003-cü ilin prezident seçkilərindən sonra andiçmə mərasimində etdiyi çıxışı xatırlayaq. Bu, yalnız seçki prosedurundan və ya protokoldan irəli gələn çıxış deyildi. Bu çıxış hələ 22 il əvvəl elan olunan güclü Azərbaycanın yol xəritəsi idi. Bu, Azərbaycanın inkişafının və gələcək uğurlarının təməlində dayanan əsas tezislərdən ibarət bir proqram idi. Ötən 22 ilin bütün reallıqları göstərir ki, bu yol xəritəsində öz əksini tapan bütün məsələlər həyata vəsiqə alıb, Prezident İlham Əliyevin xalqa verdiyi bütün vədlər layiqincə yerinə yetirilib.
2003-cü il oktyabrın 31-də keçirilən andiçmə mərasimində göstərilmiş bu böyük etimada görə Azərbaycan xalqına özünün dərin təşəkkürünü bildirən Prezident İlham Əliyev demişdir: "Mən bu böyük etimadı doğruldacağam, bu vəzifənin öhdəsindən layiqincə gələcəyəm, Heydər Əliyevin siyasətini davam etdirəcəyəm. Oktyabrın 15-də Azərbaycan xalqı seçki məntəqələrinə gələrək Heydər Əliyev siyasətinə səs veribdir. Sülhə, əmin-amanlığa, tərəqqiyə, inkişafa, quruculuğa, sabitliyə səs veribdir. Bu siyasətə Azərbaycanda alternativ yoxdur".
Bəli, Prezident İlham Əliyevin rəhbərliyi ilə geridə qoyduğumuz 22 ilin ən böyük həqiqətlərindən biri Heydər Əliyev yolunun davam etdirilməsi və Ulu Öndərin ideyalarının həyata vəsiqə almasıdır. Məhz bu siyasətin qətiyyətlə həyata keçirilməsi, dövrün çağırışlarından irəli gələrək daha da zənginləşdirilməsi Azərbaycanın bu gün fəxrlə bəhs etdiyimiz yüksəlişinin, regionda lider dövlətə, dünyada söz sahibinə çevrilməsinin əsasında dayanır. Ötən 22 illik tariximizin ən böyük həqiqətlərindən biri də budur: Azərbaycan cəmiyyəti Heydər Əliyev siyasətinə heç bir alternativi qəbul etmir.
22 il əvvəlin reallıqlarından irəli gələrək Prezident İlham Əliyev bir sıra məsələləri prioritet məqsədlər olaraq bəyan etmişdi. Bu sırada regionların tarazlı sosial-iqtisadi inkişafının təmin edilməsi, yeni iş yerlərinin açılması, çadır düşərgələrinin ləğvi kimi vəzifələr növbəti beşillik üçün əsas hədəflər kimi müəyyənləşdirilmişdi. Və cənab İlham Əliyevin birinci müddət prezidentliyi dövründə bu vəzifələrin yerinə yetirilməsi istiqamətində çox mühüm uğurların əldə olunduğu artıq göz önündə idi. 2003-2008-ci illərdə artıq ölkə üzrə 741 min yeni iş yeri yaradılmışdı. 2007-ci ilə qədər isə artıq bütün çadır şəhərcikləri ləğv edilmişdi. Habelə Ulu Öndərin təməlini qoyduğu Bakı-Tbilisi-Ceyhan neft kəmərinin inşası başa çatdırılmış və Azərbaycan neftinin ixracına başlanılmışdı. 2003-2008-ci illərdə Azərbaycanda ümumi daxili məhsul 2,7 dəfə, dövlət büdcəsi isə on dəfədən çox artmışdı.
Geridə qoyduğumuz 22 ilin reallıqları fonunda isə biz daha böyük uğurlardan, daha möhtəşəm nailiyyətlərdən bəhs edirik. Bu illər ərzində Azərbaycan həm siyasi, həm iqtisadi müstəvidə regionda lider dövlətə, dünyada isə söz sahibinə çevrilib. "Cənub qaz dəhlizi", Bakı-Tbilisi-Qars kimi nəhəng layihələrin reallaşdırılması Azərbaycanın iqtisadi inkişafında mühüm indiqatorlara çevrilməklə yanaşı, qlobal müstəvidə respublikamızın nüfuzunu və imicini yüksəldib. 2026-cı ildə Azərbaycanın dövlət büdcəsinin xərclərinin 41 milyard 548,6 milyon manat olması proqnozlaşdırılır. Azərbaycanın strateji valyuta ehtiyatları 80 milyard ABŞ dolları təşkil edir. Elə bu rəqəmlər Azərbaycanın 22 ildə keçdiyi inkişaf yolunu aydın etdirən statistik göstəricilərdir. Prezident İlham Əliyevin yürütdüyü məqsədyönlü siyasət illər öncə Azərbaycanı həm də kosmik kluba üzv edib.
Bu gün dünyanın aparıcı siyasi mərkəzlərinin Cənubi Qafqaz regionundakı yaxın və strateji tərəfdaşı məhz Azərbaycandır. Əlamətdar günlərdə onların rəhbərləri tərəfindən Prezident İlham Əliyevin ünvanına gələn məktubların məzmunu da bu tərəfdaşlığın təzahürü olmaqla bərabər, dövlətimizin başçısının və Azərbaycanın yüksək qlobal nüfuzundan xəbər verir. Prezident İlham Əliyevin son aylar ABŞ və Çinə səfərləri, habelə son həftələrdə Avropa İttifaqının siyasi dialoq platformalarından olan "Avropa Siyasi Birliyi"nin Danimarkada keçirilən 7-ci Zirvə toplantısında, Türk Dövlətləri Təşkilatının Dövlət Başçıları Şurasının 12-ci Zirvə Görüşündə, MDB Dövlət Başçıları Şurasının geniş tərkibdə iclasında və Yaxın Şərq Sülh Sammitində iştirakı bir daha dövlətimizin başçısının yüksək nüfuzunu nümayiş etdirir.
Prezident İlham Əliyevin Azərbaycana rəhbərliyinin ilk günündən qarşıya qoyduğu ən ümdə və prioritet vəzifə isə torpaqlarımızın işğaldan azad edilməsi idi. 2003-cü ildə andiçmə zamanı çıxışında bu barədə demişdi: "Azərbaycanın torpaqları işğaldan azad olunmalıdır, bir milyon qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun, azad edəcəkdir".
Prezident İlham Əliyev Azərbaycanı inkişaf yoluna çıxarmaqla həm də torpaqlarımızın işğaldan azad olunması üçün tarixi şərait formalaşdırdı. 5 il əvvəl 44 günlük Vətən müharibəsində Prezident Ali Baş Komandan kimi bu ümummilli vəzifənin də yerinə yetirilməsini təmin etməklə xalqımızın yeganə ağrılı probleminə son qoydu. Biz Vətən savaşında yalnız Ermənistana qalib gəlmədik, həm də Qərb siyasi mərkəzlərinin dəstəklədiyi dünya erməniliyini məğlub etdik. Vətən müharibəsindəki Zəfər estafetinin uğurla davam etdirilməsinin nəticəsi olaraq 2023-cü ilin sentyabrında Qarabağda erməni separatizminə son qoyuldu və bununla da Prezident İlham Əliyev Azərbaycan dövləti qarşısında növbəti tarixi missiyanı yerinə yetirərək bütün torpaqlarımız üzərində milli suverenliyimizi təmin etdi.
Heydər Əliyev siyasi kursunun layiqli davamçısı olan Prezident İlham Əliyevin ölkəmizə rəhbərliyinin geridə qalan 22 ili tariximizi möhtəşəm uğurlarla zənginləşdirib. Bu illər ərzində Prezident İlham Əliyev bütün vədlərini qətiyyətlə və layiqincə yerinə yetirib, Azərbaycanı tarixinin ən qüdrətli dövlətinə çevirib. İşğaldan azad edilmiş torpaqlarımızda davam edən sürətli quruculuq və Azərbaycanın qədəm qoyduğu yeni dövrün mənzərəsi onu göstərir ki, Prezident İlham Əliyevin liderliyi ilə qarşıda bizi növbəti nailiyyətlər gözləyir.
Nəsib MƏHƏMƏLİYEV,
Milli Məclisin deputatı
