Azərbaycan Qarabağı və Şərqi Zəngəzuru işğaldan azad etməklə təkcə öz ərazi bütövlüyünü və suverenliyini təmin etməyib, eyni zamanda, Ermənistanın dövlət quruculuğuna çox böyük təkan verdi. Ermənistanın bu vaxta qədər normal, beynəlxalq hüquqa, onun norma və prinsiplərinə uyğun konstitusiyası belə yoxdur. Daha çox təcavüzkarlığı təşviq edən, qonşu dövlətlərə ərazi iddiası irəli sürən rəsmi İrəvan mövcud sənədlə beynəlxalq hüququn normalarını pozur. Bu həm də sülh prosesinə ciddi maneədir. Azərbaycan Prezidenti İlham Əliyev fevralın 1-də Parlamentlərarası İttifaqın Baş katibi Martin Çunqonqu qəbul edərkən də Ermənistanın əsas qanununun dəyişməsi məsələsinə toxunub. Dövlət başçısı bildirib ki, İrəvanın Müstəqillik Bəyannaməsində Azərbaycanın Qarabağ bölgəsinin Ermənistanla birləşdirilməsinə və onun ərazi bütövlüyünün pozulmasına birbaşa çağırışlar var və bu sənədə istinadlar da konstitusiyasında öz əksini tapıb. O vurğulayıb ki, hazırda qonşu ölkədə bu mövzuda müzakirələrin başlanması müsbət addım kimi qiymətləndirilir və bu, sülh prosesinin tezliklə yekunlaşdırılması üçün yaxşı imkan yarada bilər.
Cənab İlham Əliyev son çıxışlarında Ermənistanla mümkün sülh sazişinin əldə edilməsi şərtlərinin parametrlərini və prinsiplərini aydın və konkret şəkildə müəyyən etdi ki, bunlardan biri də Ermənistan qanunvericiliyinə edilən dəyişikliklərdir ki, bu da Ermənistanın Azərbaycana qarşı ərazi iddialarından rəsmən imtina etməsidir. Azərbaycan. Yalnız bu şərtlə sülh sazişi imzalamaq olar.
Erməni tərəfi Azərbaycanın ərazi bütövlüyünü şifahi olaraq tanımaqla gələcəkdə revanş imkanlarını qoruyub saxlamağa çalışır. Təəssüflər olsun ki, İrəvanı fəal dəstəkləyən bir sıra Qərb siyasətçiləri guya sülh sazişinin imzalanmasında heç bir hüquqi maneə görmürlər. Onlar Ermənistan qanunvericiliyinin bütün bu saxtakarlığına göz yumur, bunun ölkələr normal münasibətlərin qurulmasına maneə olmadığını bilidirirlər. Baxmayaraq ki, hamı yaxşı bilir ki, sülh sazişi imzalanmadan nə regional nəqliyyat kommunikasiyalarının açılması, nə Ermənistanın Türkiyə ilə sərhədinin açılması, nə region ölkələri arasında iqtisadi əməkdaşlığın qurulması mümkün deyil.
Ermənistan rəsmiləri və onların xarici havadarları xüsusi ilə də cənab İlham Əliyevin sözləri ilə desək “Fransa və + dövlətlər” bunun sülh prosesinə heç bir “təsiri” olmadığını düşünərək, Ermənistan qanunvericiliyində dəyişiklik etmədən, mümkün qədər tez sülh müqaviləsinə nail olmaq mövzusunu güclü şəkildə təbliğ edirlər. Elə bu günlərdə Prezident İlham Əliyev Parlamentlərarası İttifaqın Baş katibi Martin Çunqonqu qəbul edərkən də Fransanın, həmçinin Ermənistanın militarizasiya siyasəti apardığını, geosiyasi intriqaların təşəbbüskarı olduğu, həmçinin rəsmi Parisin regionda vəziyyətin gərginləşməsinin səbəbkarı olduğunu, müxtəlif beynəlxalq təşkilatlarda və parlament müstəvilərində anti-Azərbaycan siyasət yürütdüyünü vurğulamışdı.
Bir məsələni də diqqətdən qaçırmaq olmaz ki, Ermənistan rəsmiləri Azərbaycana qarşı müxtəlif beynəlxalq platformalardan istifadə etməyə, burada Qarabağın erməni əhalisinin qondarma “blokadası, etnik təmizləməsi və mədəni irsin qorunması” tezislərini irəli sürərək “beynəlxalq səviyyədə tanınmasına” nail olmağa çalışırlar. Ölkəmizə sanksiya tətbiq edilməsini və müəyyən qiymətləndirmə missiyalarının göndərilməsini tələb edirlər. Bu, Azərbaycanın suverenliyinin açıq şəkildə pozulması və digər müstəqil dövlətin daxili işlərinə müdaxilədir. Eyni zamanda, erməni diplomatları və siyasətçiləri daim mövcud olmayan coğrafi terminlərdən (Dağlıq Qarabağ Respublikası, Artsax), yaşayış məntəqələrinin erməniləşdirilmiş adlarından və daha çox şeylərdən istifadə edirlər ki, bu da İrəvanın ərazi iddialarından əl çəkmədiyini göstərir.
Azərbaycan rəhbərliyi gələcəkdə mümkün revanş üçün İrəvanda heç bir boşluq buraxmaq niyyətində deyil. Biz bilirik ki, istər Ermənistanda , istərsə də xarici dairələrdə bir sıra revanşist qüvvələr var və onlar hər zaman ölkəmizə qarşı bu iddiada olacaqlar. Bunun qarşısının alınmasında əsas məsələdən biri də məhz qanunvericiliyin dəyişməsidir. Əks halda heç bir razılaşma imzalanmayacaq və Bakıya edilən hər hansı təzyiq İrəvana kömək etməyəcəkdir. Cənab İlham Əliyev sülh yolu ilə nizamlanma ilə bağlı öz mövqeyini həmişə açıq və dürüst ifadə edib və Ermənistan rəhbərliyindən fərqli olaraq heç vaxt həqiqəti öz xalqından və beynəlxalq ictimaiyyətdən gizlətməmişdir. Cənab İlham Əliyevin xarici və daxili siyasətinin uğurunun əsasında da ölkənin müstəqilliyi və firavanlığı naminə nəyi və nə vaxt edəcəyini bilən Azərbaycan xalqının öz liderinə tam inamıdır. Deməli, Ermənistan rəhbərliyinin iki kresloda əyləşməyə can atdığı, uğursuz xarici siyasətinin paradoksları və ziddiyyətləri dərhal bu cəbhədə də növbəti məğlubiyyətlə başa çatacaqdır. Ermənistan rəhbərliyinin öz xalqını və beynəlxalq ictimaiyyəti aldatmaq üzrə cəhdləri iflasa məhkumdur, çünki İrəvan nəhayət başa düşməlidir ki, heç kim Azərbaycanda heç bir qeyri-müəyyən vədlərə və dinc arzulara dair yalan təminatlara inanmır. Əgər Ermənistan rəhbərliyi həqiqətən də sülh və sabitlik istəyirsə, o zaman cənab İlham Əliyevin təklif etdiyi sülh gündəliyini qəbul etməli və müxtəlif beynəlxalq platformalarda yalnız iki xalqın mümkün barışığına mane olan, ərazi iddialarından əl çəkən təxribat xarakterli hərəkətləri dərhal dayandırmalı və nəhayət, öz daxili qanunvericiliklərini beynəlxalq hüquqa və BMT Nizamnaməsinə uyğunlaşdırmalıdır.
Milli Məclisin Komitə sədri, professor Hicran Hüseynova
